Lo 26 de heurèr, Margalida Rambeau-Arnautou que morí; qu’anava fenir ueitanta cinc ans. 

Qu’estó capdau de l’Escòla Gaston Febus. Que hasè valer lo gascon e que s’i hasèva entà alandar las pòrtas, partatjar, escambiar, amassar.

Que poderatz legir un omenatge ad aquera dauna suus Reclams qui vienen, lo numèro 849.

Roncesvals qu’ei un poèma epic qui conta la batalha de Roncesvals (15 d’aost de 778). Aquesta qu’ei hòrt coneishuda mercés a la Chanson de Roland, long poèma anglo-normand datat deu sègle XIau. Mes l’istòria de Manciet qu’ei diferenta.

Lo poèma ancian que parla de la tradida de Ganelon, l’ataca deus sarrasins, la venjança de Carlesmanhe e la condemnacion deu tradidor. Que sabem qu’aquera version n’ei pas istorica. Manciet que presenta las hèitas vertadèras quan los vascons atacan sobte l’arrèrguarda de l’armada francesa, comandada peu comte Rotland. Lo generau Lop que conduseish l’armada deus vascons, compausada de bascos e de gascons.

L’estille de Manciet que balha tota la soa fòrça ad aquera epopèa. E que tocam lo ligam de l’autor dab lo país, dab la fiertat de la lenga. De mei, lo lirisme de Manciet que s'exprimeish dab beutat quan hè parlar la lua o las pèiras.

Los legidors qu'ac an comprés. Qu'ei ua òbra de referéncia, establida per Estela Comellas. Navèra edicion 2017. Trilingüe (occitan gascon – basco – francés). Se la voletz legir...

Viral qu’ei lo darrèr libe de Sèrgi Javaloyès. Escriut en francés, que conta l’istòria de Danièl, espitalizat e confrontat a l’urgéncia de víver. Au gusmeth de la malaudia, que’s bremba de la soa joenessa com èra estudiant a Pau dens las annadas setanta, de la violéncia de las accions bascas, de las prumèras experiéncias amorosas… En aqueth libe, que i a quauquarren de personau, de viscut, qui parla tot dret au legidor.

Dens lo numèro 848 de Reclams, que trobaratz las prumèras paginas deu libe Viral, arreviradas per l’autor, libe aperat en gascon La frinèsta.

Ueitanta ans a, qu’èram en 1939. Ua atmosfèra qui mesclava los cambiaments sociaus deu Front popular, arribat en 36, e las tensions d’avant guèrra. Quauquarren qui podem enténer en aqueth poema, Bona annada, tirat de l’Armanac de la Gascougno, 1939.