Vita vitanta

Qu’ac sabem tots, Miquèu Camelat (1871-1962) qu’ei un escrivan, un autor qui coneish l’engenie d’escríver. De segur, los sons relats de la vita vitanta que son testimònis de tròç de vita d'un parçan montanhau, Arrens en Lavedan, on demorava quasi tostemps. Mes la faiçon de contar qu’ei fina, delicada ; la narracion simpla e l’estile clar, elegant. Que’s guarda de jutjar los personatges, çò qui auhereish ua vertadèra sobrietat e, fin finala, ua noblessa a las situacions contadas. Camelat qu'ei retrèit, modèste, tot en estant un mèste escrivan, la soa lenga que demora un exemple. 

Joan Salles-Loustau, qui hascoc en 1991 ua tèsi remarcada sus Miquèu Camelat, que ns'a preparat ua version sancèra e bilingua, dab cincanta relats, arrevirats donc en francés (sonque lo tòme 1 qu'ei publicat). A còps, los tèmas que pòden paréisher vielhòts, mòdapassat. Totun podem atau caminar au près deus ajòus, anar a l’encontre de las nostas arraditz e, en especiau, agradar lo noste parlar. E coma Italo Calvino e ns'ac ditz dens Perché leggere i classici [Perqué legir los classics] : Un classico è un libro che non ha mai finito di dire quel che ha da dire. [Un classic qu’ei un libe qui n’a pas jamei fenit de díser çò qu'a a díser.]

Isabèu de la Valea

E voletz jogar dambe la lenga occitana ? Alavetz Isabèu de la Valea que'vs deveré agradar. L'autor, Eric Gonzalès, que'vs mia en condes de tota traca. Quauques tèxtes son bracs, autes que son mei longs. Quauques uns son realistas, autes que son fantastics. E, de novèla en novèla, que caminaratz de la narracion tradicionau de cap a la fantasia.

Lo seriós, lo plasent, lo grèu, lo leugèr, l'estranh, que i a tot aquò en aqueras novèlas. Jo e Arnauda que conta ua bèra istoèra d'amor carat, Cent-dètz ans la fin d'un òme de d'autes còps, d'ua auta lenga, L'agraula qu'arrevita dambe las malediccions ancianas, e La con.hession d'un ex-viatjador espaciotemporau que parla d'un amor ... espaciotemporau ! Etc. Etc.

Entà descobrir un pauc mei, que podetz legir l'article La nouvelle un genre qui sied aux Gascons.

O que podetz crompar lo libe. Plàser assegurat !

Viral

Daniel que’s desvelha a 4ò25 deu maitin dens ua cramba d’espitau. Viral, lo libe escriut en francés per Sèrgi Javaloyès, que relata dus meses passats dens aqueth lòc claus, dab murs blus e ua finèstra. A còps que passa ua hoa. L’idée de la mort le côtoyait à chaque instant. Il se sentait cerné. Il n’avait comme seule échappatoire que la fenêtre et le paysage qui s’offrait à lui. Totun, n’es pas tot a fèit com aquò. Daniel que’s bremba tanben deu temps passat, de hèitas, d’amors. E qu’ac escriu tot sus un quasern.

Viral qu’ei un roman intime, hons, intense. La malaudia qu’ei presenta, coma un contèxte, un quaucom qui constrénh, e tanben un quaucom qui permet de tornar véser o enténer amics d’avant, un quaucom qui permet de brembà’s. E l’amor de Sandra, la hemna, qu’ei lo ligam hòrt, potent, a la vita.

De cap a la lentor deus jorns d’espitau, lo ritme deu libe ei viu, briu poderén díser. Un roman deus màgers.

Anna Karenina

Ne cau pas presentar Anna Karenina, lo cap d'òbra de Leòn Tolstoï pareishut en 1877. L'autor qu'i opausa dus cobles, l'un copable e ahuecat, l'aute calme e aunèst.

Totun, legir aqueste libe en lenga d'òc, e mèma en gascon aranés, aquò qu'es mes originau. Qu'ei çò que perpausa l'Institut d'Estudis Aranesi en tot botar en linha l'òbra arrevirada per Antòni Noguès suu son site.

Bèth peu de sau

Lo comissari Magret que torna dab un tresau volume: Bèth peu de sau. Aqueste roman-policièr, hòrt contemporanèu, que confirma l'engenh de contaire de Joan Loís Lavit. Que trobaratz robòts, blògs, psis... Dab un esperit trufandèr, coma los autes libes de Magret, Zocalfar e Lo tin tin d'Ergé, aquesta òbra que'vs amusarà a còp segur.

Bèth peu de sau, Joan Loís Lavit, 2018, Letras d'òc.

Edicions Reclams
Administration - Secrétariat
18 chemin de Gascogne
31800 LANDORTHE
Tél : 06 87 80 28 60
Cette adresse e-mail est protégée contre les robots spammeurs. Vous devez activer le JavaScript pour la visualiser.

©2021  Reclams - Escòla Gaston Febus