Bernat Manciet que neishoc a Sabres lo 27 de seteme de 1923, e que’s moriscoc lo 2 de junh de 2005 au Mont. Après dètz ans de carrièra diplomatica, que demòra dens La Lana (1955). Que comença a escríver e, de tira, que vad un autor deus magèrs deu sègle XX^au.  Lo gascon, ce disè, qu'ei la lenga deus mens muscles e deu men alet. Que publica los sons prumèrs poèmas dens la revista Reclams. Que hè tanben lo capredactor de la revista Òc.

Òbra

La soa poesia qu’ei complida, originau e universau. Bernat Manciet, entervistat en 1996 per Laure Adler dens la Maison de la Poésie a Paris, ç'afirma : lo huec dens la poesia qu'ei tot.

De mes, que pintra l'amna pregonda, l'identitat deus Gascons. Aquí que subsisteish, sàpias-ac, ua poblada escarnida per l'Istòria. Jo que'u  balharèi mélher: legenda, ce digó. E de hèit, qu'espia los Gascons coma un pòble, coma ac podem apreciar per exemple en Roncesvals : 

Extrèit (Carles lo Manhe qu'a aprés la mòrt de Rotland, lo son nebot e prefècte de Bretanha ; que devisa dab Lop Sanç lo generau deus Vascons):

Carles
    çò que vau jo respóner a las lèrmas de Bretanha?
Lop-Sanç
    respon: "un puple nòble que lo guarda" 
...
Lop-Sanç
    rei malerós te n'anis pas enqüèra
    t'ès desbrombada l'espada balhada
    a Rotland ton aimat e com te prometó
    que nada man d'enemic la tinossi
    la teni lusenta
    que te la torni per l'aunor de la mia gent
    e de Lop-Sanç en agis sovenença

Bibliografia

Bernat Manciet qu’ensaja e que mestreja tots los genres : sonet, poesia epica, teatre, novèla, roman, essai. La sua òbra qu’ei de las granas. Citem

• Accidents, Institut d’Estudis Occitans, 1955 – lo son prumèr recuelh de poesia
• Lo gojat de Noveme, Ed. Reclams, 1964 – roman sus ua familha lanusqueta miaçada per l'arroeina e la mort
• Casau perdut, Princi Negre & Ed. Reclams, 1986 – novèlas que’s semblan aus tablèus de la Lana
• L’enterrament a Sabres, Ed. Ultreïa, 1989, Poésie/Gallimard, 2010 – sol autor regionau publicat per Gallimard
• Ulisse au flume, Ed. Reclams, 2011 – darrèra pèça de teatre
• Roncesvals, Covedi, 1997, navèra version, Ed. Reclams, 2016 – epopea trilingua sus l’encontre de dus pòbles, los Vascons gavidat per Lop et los Francés miat per Carlesmanhe
• Impromptús, Ed. Reclams, 2023 – recuelh de poèmas liures

Bibliografia sancèra suu site internet deus amics de Bernat Manciet :

Tà saber mes, ací qu'avetz lo son site