La revista en linha

ARTICLES EN LECTURA LIURA

Editoriau 854

En temps deu confinament que ns’avisam que la lectura que vad mei que mei màger, au mensh taus qui n’an pas a sauvar las vitas, taus qui an a tribalhar shens cès ni pausa, qui’ns permeten de continuar a víver haut o baish com abans que lo Covid-19 avosse hèit tant de domaus, e que’n hè enqüèra, malaja. Permor d’aquò qu’avem hargat au mei viste la nosta revista. Aquestes Reclams que hèn vàler la diversitat de la creacion literària gascona mes tanben deus país d’Òc. Com tostemps, qu’essajam de conciliar los autors deu sègle XXau com per exemple Andrèu Pic e Ismaèl Girard o navèths calams com Danièl Lamaison dont lo recuelh de poesia e serà publicat augan. Joaquim Blasco, professor d'espanhòu a La Reünion, que ns'enviè un article sus la despartida de l'escrivan ecineasta Luis Sepúlveda per'mor de la Covid 19. Qu’avem essajat tanben d’escotar los lectors deus Reclams quan s’exprimín a la nosta sollicitacion, en hornir un lexic tà quasi tots los tèxtes ací presentats. Que cau esperar que la pandemia ne serà pas mei qu’un maishant saunei. Totun, a çò qui’n vedem, ne n’èm pas au cap.

Sèrgi Javaloyès & Maurici Romieu

Amiga

Que t’escrivi entà’t díser un gran mercés peu present. Que m’agrada hèra la pichona e escairida estatua. Suu vielh escritòri, bailinat per la lutz deu dia o los arrais deu sorelh primavèr, que trona Thòt, lo diu egipcian deus poètas.

Ò Thòt, n’ès pas aquiu entà’m metamorfosar en un vertadèr escrivan ! Que m’acontenti, sonque escrivalhon de bordalat, en trebucar suus mots, de har saber la mea faiçon de concéber la vita, de cridar contra l’injustícia e la holia deus òmis, d’arrefusar la nosta lenga que sia arredusida a l’estat de lenga morta. Shens nada pretension, que hèi rotlar la mea prauba pèira de cap a l’ostau noste dab un sarròt de trebucs. Vertat qu’ei ! Que demora pan sus la pòsta !

Amiga, dab aqueth simbèu planvengut, que son la toa pensada e lo ton arrisolet complicis qui m’acompanhan suu camin mauaisit de l’escritura.

Edicions Reclams
Administration - Secrétariat
18 chemin de Gascogne
31800 LANDORTHE
Tél : 06 87 80 28 60
Cette adresse e-mail est protégée contre les robots spammeurs. Vous devez activer le JavaScript pour la visualiser.

©2021  Reclams - Escòla Gaston Febus