Maurici Romieu

Sèrgi Javaloyès que vien de deishar la soa carga de capredactor de Reclams. Capredactor d’ua revista trimestriau com Reclams qu’ei ua carga qui demanda mantua competéncia e un investiment personau : recuélher los tèxtes, classà’us segon las diferentas rubricas de la revista,

repassà’us… Un tribalh qui’s complica quan cau sollicitar tèxtes de la part deus autors pr’amor totas las rubricas de la revista ne son pas pleadas o pr’amor un numèro n’ei pas completament clavat.

Aquera carga, Sèrgi que l’a assumida dab paciéncia e passion pendent vint ans. Que la prenó quauques ans après la demission deu capredactor precedent au parat de la crisi de 1996. La transicion qu’estó assegurada per Eric Gonzales qui, sus pè, s’encarguè d’apitar lo numèro especiau deu centenari 1897-1997, dab l’ajuda de Sèrgi Javaloyès, capredactor adjunt.

Si torni suus eveniments qui marquèn las annadas 1996 e 1997, qu’ei tà brombar que las associacions viven gràcias a l’engatjament passionat e au tribalh acaborrit deus sons membres. N’ac cau pas desbrembar !